๑۩۞۩๑ hideaway ๑۩۞۩๑

ang gusto kong love

yung magaling ang mga daliri sa backrub

yung hindi nahihiyang makipaghalikan sa taxicab

yung nanggigigil sa aking flabs

yun, yun ang masarap na love.

ang gusto kong love

yung tipong pipigilan akong mag-yosi

yung hindi ako papayagang magsindi

at matututo akong ma-inlab

sa lasa ng lollipop

kasi nga, bawal sa akin ang yosi

yung tipong kahit bad trip na bad trip na ako

at nanginginig na ako sa galit

at tanging nicotine fix na lang ang magpapakalma sa kin

ay hindi ko pa rin magawa

kasi nga, hindi ako pwedeng magyosi

yung tipong sa sobrang sanay na akong hindi nagyoyosi

pag nakakaamoy ako ng usok

eh parang magkakasakit ako

at mapapaisip akong aba, ang galeng!

napatigil nya ako

kahit hindi "in my own time"

yung tipong ganon kalakas ang impluwensya sa akin

yun. yun ang tipo kong love

medyo controlling.

ang gusto kong love

yung mapagpuna sa suot ko

yung tipong sasabihan ka ng harapan

"love, di ako sure sa color ng skirt mo.."

o kaya

"di ko type yang blouse mo, palitan mo."

kahit ilang beses kong ipaliwanag na keri ko naman

at ang dami ng nagsabi sa akin na maganda naman

at sya lang ang hindi makarelate

kasi "safe" ang choices nya sa damit

yung tipong mapipilitan akong magpalit ng wardrobe

at bumili ng mga brands na gusto nya

at magkaron ng "his and hers" na articles of clothing

his and hers nike turf shoes

his and hers levi’s jeans

his and hers watches

his and hers shirts

his and hers tattered pants

dahil ang cute naming tingnan pag magkasama kami

ang gusto kong love

yung hindi pwedeng hindi kami magkita sa loob ng isang araw

yung tipong para akong mababaliw pag hindi ko nasilayan

ang kanyang ngiti

o marinig yung kanyang mga pang-aasar

yung tipong wala kaming planong magkita

pero pagsapit ng alas onse ng gabi

eh hindi ko pala kayang hindi sya makasama kahit saglit lang

kaya magtataxi ako papunta sa kanila

at tumambay sa mcdo ng isang oras

at umuwi ulit ng nakataxi syempre

pero okay lang, at least nagkita kami

yung tipong halos magkapitbahay lang naman kami

at sa ortigas ako nagtatrabaho

pero susunduin nya ako sa opisina

para ihatid ulit sa bahay.

ganun. ganun ang tipo kong love.

medyo magastos.

ang gusto kong love

yung tipong dadamayan ako

sa pagpuna ko ng mga maling grammar ng ibang tao

yung patagong tumititig sa mga dumadaan

pagkatapos ay titingin sa kin

sabay tatawa kasi nababaduyan din sya sa porma

nung kawawang nilalang na kadadaan lang

yung tipong mayabang

iisa-isahin nya sa yo ang accomplishments nya

at kung anong kaya nyang gawin

at ipagmamalaki nya sa ‘king

sa UP sya nag-aral

at ako’y isang hamak na atenista lang

yung mararamdaman kong aping-api na ako

dahil "he doesn’t think highly of ateneans"

yung tipong ganun.

ganun ang tipo kong love.

elitista.

ang gusto kong love

yung kelangang ungkatin lahat ng nangyari sa buhay ko

at mag-uubos kami ng ilang araw

para pag-usapan kung sino ang crush ko nung grade 2 ako

at kung anong ikalimang dahilan

kung bakit kami nagbreak nung pangatlong boyfriend ko

yung palaging nagtatanong ng

"cute ba ako?"

at magseselos kung makipag-eye contact ako

sa mga cute na nakakasalubong ko sa mall

yung biglang tatahimik kapag

may nabanggit akong pangalang

medyo bago sa pandinig nya

o di kaya sobrang gasgas na

sa kakakwento ko sa kanya paulit-ulit

yung hindi bibitaw sa kamay ko

kapag naglalakad kami sa mall

at baka may sumulyap sa aking ibang cute guy

yung tipong tatawagan ako

ng walong beses sa loob ng isang araw

habang katext ko sya at ka-chat ko pa sa YM

yung tipong kami ang magiging dahilan kung bakit

nanaisin ng smart tanggalin ang kanilang

unlimited texting service

yung nagsisleeptext ng garbled messages

na kahit groggyng-groggy na tinetext pa rin ako

yung nag-aalala kapag di ako nakapagreply kaagad

kapag ako’y nasa isang shopping expedition

kahit alam naman niyang hindi ko na kayang

humawak pa ng cellphone sa dami ng bitbit ko

sabay pasaload pa ng limang piso

"di ka kasi nagtetext back kaya kala ko wala ka ng load."

yung may mga ganun pa.

yun. yun ang tipo kong love.

medyo insecure. at pasimpleng demanding.

ang gusto kong love

yung tatawagin akong tabachingching, bachuychuy, LL (lusoglusog)

yung minsan alam mong mini-mean na nya

at medyo nasasaktan na ako

yung tawa ng tawa pag di na kasya yung pantalon ko

ang gusto kong love

yung sobra kung manggigil

yung mapupuno ka ng kurot at kagat

yung maluluha ka na lang kasi "antakit"

at lalabas ka ng may pasa ng apat na araw

ang gusto kong love

yung tipong mananadya yung ipapakita sa yong

may tumatawag sa kanyang ibang babae

at kunwari eh tuwang-tuwa sya dahil kausap nya

at pagbaba eh sabay sasabihin sa yong

"gusto ko kasing malaman mo na hindi lang ikaw

ang nagkakagusto sa akin.."

yung mararamdaman mo yung sakit physically at emotionally

pero gusto nya lang palang tingnan ang reaction ng mukha ko

ganun. ganun ang gusto kong love.

masakit magbiro.

ang tipo kong love

yung araw-araw akong hinaharana

yung mahal ako ng kanyang pamilya

pati aso nya

yung halos dun na ako tumira sa kanila

yung kinikilig pa rin hanggang ngayon

yung memorize ang location ng mga nunal ko sa katawan

yung sa akin lang siya in love

yung minsan hassle

yung may mga imperfections

yung sobrang connected kami na tipong

pag may sakit ako, sisipunin sya

pag makakatulog na ako, mapapapikit sya

pag may iniisip ako, nasabi na niya

pag magtetext pa lang ako, tumatawag na sya

yung mala-esp ang drama…

ganun ang tipo kong love…

yung siya at ako ay

iisa.

*********************************************************************************************************************

inspired by a post by siege.